Anmelden Anmelden[ x ]          
| Passwort vergessen?
Registrieren  |  Suche Anmelden
Forum    ›   Anlässe    ›   Heiratsantrag & Verlobung    ›   Kein Heiratsantrag bekommen
Kein Heiratsantrag bekommen
 1 2 3 4 5
Pluto

nicht registriert

am 03.03.2008

Kein Heiratsantrag bekommen

Hallo zäme

De Traum vo (fast) jedem Meitli esches doch, mol en Hürotsantrag öberzcho, wenn's gross esch.
Dä Traum han ech ou gha. Leider esch min Partner det döre ned so ideenreich oder romantisch. Er hed mol gseid "bruchts das hötzotags no?". Ech be scho chlii truurig hani kein Antrag öbercho. Mer hend scho gseid mer hürote irgendwenn mol, de hätt er das doch spontan mol chönne mache. Ohni grosse Aufwand. En Fründin vo mer esch vo ihrem Fründ spontan ide Ferien am Strand gfrogt worde, ohni grosses Tamtam drumrum. Soooo schön.

Ech ha för üses 1. Date de 1. Schritt gmacht, en Hürotsantrag hätt ech jetzt vo ehm erwartet, das hani ned selber wölle mache - be det döre chli altmodisch Jäh no, de hend mer letscht Dezember halt eifach mol es Datum im 2008 gsucht, well ech s'Thema weder mol angegriffen ha. Ha dänkt söscht werd ech alt ond grau bes öbis god!

Wär esch wie ech en "Braut ohni Heiratsantrag"? Was dänkid ehr do drüber?

LG
Pluto



knorrli  am 03.03.2008

Re: Kein Heiratsantrag bekommen

hallo
oh das find ich schad hesch kein hüratsatrag becho
hesch es dim schatz gseit?
ich han eine übercho au wenn ichs mer romantischer vorgstellt han..aber bin glücklich darüber



streghetta  am 03.03.2008

Re: Kein Heiratsantrag bekommen

Hoi Du! Zum Glück bini nit die einzigi! Ich ha eigentlich au kein Hürotsatrag becho. Ich hanem e Ultimatum gstellt, bis 31.12.2007 e Atrag zmache, will ich nämlich au dr 1. Schritt gmacht ha wo mer uns kenneglernt händ. Ich ha mi Verlobigsring scho im Juli (ohni Atrag, do hesch....) becho, und ich ha denn am Sylvester umezickt (!) bis er denn mit Ach und Krach gfrogt het..... isch jo au nit dr Sinn!

Männer! was solls..... hürote tüend mer am 8.8.08, das isch sit em Oktober plant...



jovia

nicht registriert

am 03.03.2008

Re: Kein Heiratsantrag bekommen

Hi zäme

Ich findes ai sehr schad wemmer kei Hüratsatrag becho hed - eifach weil ich dänke dass das doch e spezielle Momänt isch wo me nie vergisst. Mier hend ai scho vorhär übers Hüürate gredt und ai gwüsst dass mier i dem Jahr wend hürate, aber de Hüratsatrag isch denn doch überraschend für mich cho und wunderschön gsi .

Hmmm... es Ultimatum gstellt tönt scho nu extrem find ich ehrlich gseihd. Dass me kei Hüratsatrag macht oder bechund isch ja nu s'einte, aber dass tönt scho nu speziell. Glaube e so hätt ich scho nu biz Mieh. Wie gahsch du demit um dass du soweyt hesch miesse gah?


29.02.08 & 19.07.08



madmadi  am 03.03.2008

Re: Kein Heiratsantrag bekommen

Schräg, mer wär's eigentli glich gsi, de Atrag sälber z mache, aber mi Schatz het druf bestande, dass är das wott mache (velecht ou zum no Zit schinde ).

Ich ha ehm scho länger gseit, dass es doch sau-passend wär, am 08.08.08 z hürate, wenn das üse 10. Johrestag esch. Chli meh als es Johr vorhär, also letscht Juli, hani denn nomol en Alauf gno ond ne (fasch ächli verzwiflet) gfrogt, öb er sech denn gar ned secher seig, dass ich die Frau be, woner met ere wett alt wärde ond er esch denn ned so druf igange. Eigentli hätt' ich ehm ebe denn en Atrag gmacht, aber er het sech richtig gwehrt ond gseit, das göi ned, wenn ich froge...

Es het mi zwar när di längscht Zit beschäftiget, aber i hane jo ou ned welle z fescht onder Drock setze. Drom hani dänkt, i warti mou öise 9. Johrestag ab. De ganz Obe esch nüt passiert (ond mer send doch romantisch go ässe). Mini liecht Enttüschig hani zrugg-gha, um de schön Obe ned z verdärbe ond denn, ganz chorz vorem is Bett go het er denn gseit, er heig sech jetzt entschede ond het mi gfrogt, öb ich ehn nöchscht Johr (also ebe 2008) wett hürote.

Ich ha mer ou emmer so öppis Super-romantisches, Organisierts vorgstellt, aber i weiss, dass mi Liebscht kei Romantiker esch ond im Hiblick uf das, esch es jo glich super gsi.

Be denn aber glich chli onsecher worde, öb er wörkli scho bereit esch för dä Schritt, woner emmer usgwiche esch, wenni vo de Planig agfange ha. Uf di eint Site, muemer d Manne mängisch chli zu ehrem Glöck zwinge und uf di ander Site hani jooo ned welle, dass er mer irgendwenn emou vorhet, ich heig ne derzue öberschnöret oder so.

Jetzt, wo's ned emou me es halbs Johr goht, het's aber rächt besseret. Er het sogar "sälbständig" Flitterwocheziel gsuecht ond vorgschlage.

Hoffe, du chasch dim Zuekönftige uf subtili Art ond Wis klar mache, wie wichtig de Atrag för dech esch ond dass er denn - ou wenn's velecht sösch ned so sini Art wär - för dech öppis schöns organisiert.

Grüessli
madmadi


Ich hürote mi Schatz ganz genau 10 Johr nach öisem erschte Koss, am 8. August 2008!

Editiert 03.03.08



madmadi  am 03.03.2008

Re: Kein Heiratsantrag bekommen

Jovia, das hani emfall ou dänkt.

I kenne öpper, wo das das so ähnlech gmacht het ond die Ehe isch vo Afang a ned onder eme guete Stärn gstande. De Ehemaa het sogar scho gseit, wenn er zrogg chönnt, wörd er sech nömm lo dränge (er het sech ou prompt chorz nach em Hochzit i öpper anders verliebt, esch aber trotzdem no met sinere Frau zäme, rächt trurig, wenn'd mech frogsch). Es söll doch wörkli so si, dass beidi wänd ond wenn mer ned bereit esch deför, het das secher en Grond...

Ha mim Schatz ou gseit, dass das Datum för mech s Traumdatum wär, aber i well jo ned s Datum sondern ehn hürote ond wenn är sech nonig bereit fühli, söll er mer das säge, damit ich mech chönn druf istelle. Ond jetzt chonnt's doch so, wienis scho sit laangem ghofft ha!


Zitat:



Hi zäme

Ich findes ai sehr schad wemmer kei Hüratsatrag becho hed - eifach weil ich dänke dass das doch e spezielle Momänt isch wo me nie vergisst. Mier hend ai scho vorhär übers Hüürate gredt und ai gwüsst dass mier i dem Jahr wend hürate, aber de Hüratsatrag isch denn doch überraschend für mich cho und wunderschön gsi .

Hmmm... es Ultimatum gstellt tönt scho nu extrem find ich ehrlich gseihd. Dass me kei Hüratsatrag macht oder bechund isch ja nu s'einte, aber dass tönt scho nu speziell. Glaube e so hätt ich scho nu biz Mieh. Wie gahsch du demit um dass du soweyt hesch miesse gah?


29.02.08 & 19.07.08






Grüessli
madmadi


Ich hürote mi Schatz ganz genau 10 Johr nach öisem erschte Koss, am 8. August 2008!



nordliecht  am 03.03.2008

Re: Kein Heiratsantrag bekommen

fir eys ischs thema hiratä niä es thema gsey, obwohl mier es gmeinsams chind hend. ich bin e chley es brännts chind i dere beziehig. irgendwenn bin ich de doch soweyt gsi und han im ne romantische momänt es de doch wellä wissä, eb das evt. fir ihn ai es thema sigg. zum glick isch ai so gsi. ich han ihm de gseit, dass de hiiratsatrag seyni sach sig (schliesslich han ich de 1.schritt gmach, so als uisglich ). aber mier sigs wichtig, dass er ihn machi wenns fir ihn stimmi. egal eb in 1nre wuchä oder i zwei jahr. ich heigi zeyt (was ai ehrlich gmeint gsi sigi.) 4 mt später a eysäm jahrestag hed er mier en mega romantische aatrag gmacht.

ich sälber finde es extrem wichtig, dass niemmert unter druck gsetzt wird. es muess uis friäm stuck passiere, schliesslich will mer ja ai uis friäm stuck zämä alt wärdä.

griässli
nordliecht


miär freyid eys uif de 6. septämber 2008 :-)



pearl  am 04.03.2008

Re: Kein Heiratsantrag bekommen

Hallo Zusammen,

ich glaube, die Erwartungen betreff "Heiratsantrag" liegen einfach viel zu hoch. Ich als Frau habe natürlich eine Vorstellung wie schön, individuell und romantisch das sein sollte. Aber seien wir doch mal ehrlich. Männer ticken da nun mal anders.
Wir haben uns letzes Jahr verlobt. Wir waren in den Ferien in Finnland, in einem kleinen roten Häuschen und haben bei Kerzenschein ein wirklich gutes Essen genossen. Nun, meine bessere Hälfte hat dann unsere Verlobungsringe ausgepackt und gesagt "Du weisst ja um was es geht, ich weiss nicht so genau was ich sagen soll." und mir den Ring an den Finger gesteckt. Das ist halt typisch für meinen Zukünftigen und heute bin ich nicht etwa enttäuscht über diese Szene sondern muss lächeln.
Frauen macht euch keine unrealistischen Vorstellungen! Wenn ihr eine ganz konkrete Idee habt packt es selber an oder redet mit eurem Liebsten. Das ist nicht etwa unromantisch sondern bringt euch einen guten Schritt vorwärts Richtung Traumhochzeit. Vor allem sind die Herren der Schöpfung echt froh über ein paar gute Inputs. Die sind teilweise total überfordert mit diesen Themen. Oder glaubt ihr echt, dass ein Kerl, der am 24.Dezember noch nach dem passenden Geschenk für euch sucht, jetzt plötzlich das Organisationstalent wird und euch mit einem Riesenantrag überrascht?

Liebe Grüsse



madmadi  am 04.03.2008

Re: Kein Heiratsantrag bekommen

Hammer Kommentar, pearl!
Du hesch jo sooo rächt! Mer darf ned erwarte, dass eim d Manne am Nasespitz agsänd, was mer wett.

Grüessli
madmadi


Ich hürote mi Schatz ganz genau 10 Johr nach öisem erschte Koss, am 8. August 2008!



Pilz  am 04.03.2008

Re: Kein Heiratsantrag bekommen

Liebi Frauä da inä. Ich han dörfä oder müässä lernä das wänn mir Frauä öpis wänd das eusnä Mannä au mitteilä müänd. Diä schnalläds zum teil würklich nid. Darum wänn ich erwartigä händ dänn düänds eunä Mannä mitteilä und ihr werdet au becho.
Versuächdäs mal :-)
Schönä Nami
Pilz
Mir hüratäd am 20.6.2009 jupi



 1 2 3 4 5

ÜBER UNS

HOCHZEIT.ch ist ein unabhängiges Portal und beliebter Treffpunkt für Brautpaare und Dienstleister aus der Hochzeitsbranche.