Hallo liäbi Brüütlis

Ez bini endli wieder dehei und han chli Ziit zum e chli zbrichtle vo üsem Tag gescht

DSunne hät üs recht früeh scho gweckt ka und ich han gspürt, dass mir sWetter uf üsere Siite händ. Ich bi am morge schnell min Struss und de Aastecker go hole für de Tag und bi scho sehr is Stuune cho allei vom Struuss. Ich han nur Bilder xeh ka vo dene, woni uusgsuecht han und dFloristin hät mr au nur e Skizze zeigt ka, wie sie sich das vorstellt. Tja, es hät alles übertroffe, wasi mir vorgstellt han: 6 Callas als Zepter, sMittlere erhöht und dFarb isch dunkel violett. Ich bi schnell hei zum all mini Sache iizpacke für de Tag und bi zur Coiffeuse für sMake-up und dFrisur. Zersch isch sMake-up cho und nocher hämmer gad mit dr Probefrisur wiitergmacht für dTrauig und händs bim erschte mol troffe Denn hämmer gwächslet zu de Frisur für di zivil Trauig. Mini Trauzügin hät mr gholfe umziehe und nach de letschte Fotis simmer mit 20min förig los gloffe zur Trauig i de Wiischenki.
Mir händ di ganz Gsellschaft vor em Traulokal aatroffe. Zu minere Überraschig isch mini Fründin uusem Appezell det gstande und hät ihre Vater mitbrocht. Mit ihne hani sehr vil undernoh i minere Jugend. Ich bi so überrascht xi und han so Freud ka, dass mir gad dTräne nur so abekulleret sind. Mis Herz hät nur gstrahlt vor Glück. Mir sind denn alli is Lokal ine, händ zur Begrüessig es Gläsli Wii übercho und händ di letschte Minute vo üsem Lediglebe no chli chöne gnüsse. Um 14:55 händ sich alli müesse setze und üsers Liäd isch cho, wo mir uusgwählt händ: Nights in white satin. Nocher hät dStandesbeamtin dTrauig duregführt und üs es Rezept für e gueti Ehe mitgeh. Ich bi sehr zu Träne grührt xi und sogar min Schwiegervater hät es Tränli oder zwei verdrückt. Nach de Gratulatione simmer uf dDachterrasse ufe, wo en Apero uf üs gwartet hät und uf de Dächer vo Züri hämmer mit üsne engste Kollege und Familie chöne aastosse und Föteli mache.
Mir sind aaschlüssend mit dr ÖV is Restaurant Waid und händ det wiitergesse und gfiret. Es isch mega heiss xi und es hät niemr würkli Luscht ka zum Esse. Zum Glück häts so fescht gwindet und mr hät schnell verusse chöne sich go abchüele. Als Überraschig vom Restaurant häts fürs frischgebackene Ehepärli es Schoggichüechli gfüllt mit heisser Schoggi. Vo de Hitz sind aber alli recht früeh müed xi und mir händ denn alli verabschiedet und sind heigange. Nach em Revuepassiereloh vom Tag simmer völlig kaputt is Bett gfalle.

Es isch en wunderschöne Tag xi mit vielne Emotione und ich freu mi uf dTrauig und hoffe, dass es au so stressfrei ablauft wie gescht. So en schöne Tag wünsch ich eu allne au!

Liäbs Grüässli,
cosmologia

##Zivil am 10 Juni 2010 -- Trauung am 10 Juli 2010##

• Zitieren

hej cosmologia

danke für din bricht und s föteli - tönt nach eme wunderschöne tag! und ihr sind würkli es herzigs paar. gratuliere eu 2 und wünsch eu für d zuekunft nume s bescht und natürlich, dass au eue "zweit" hochzitstag so schön wird wie d ziviltrauuig!

alles gueti, chichi

...glücklich verheiratet seit dem 24. April 2010...

• Zitieren

hey cosmologia

ach soo, er hend jetzt scho zivil ghürotet und tüänd denn en monet spöter wie mer no kirchlich. danke vielmol für din bricht. gell, so chlini überraschige wie das mit em vater vo dinre kollegin wo cho isch oder dschoggichüächli, es berührt eim denn richtig.

schös föteli vo eu übrigens!

grüessli

• Zitieren

Danke für die schöne Antworte!
@Carmile: genau, 2 mol 10. im Johr 2010. Hät sich so ergeh Die Überraschige, au no so chlini sind echt sTüpfeli ufem i!

Ich werd no meh Föteli druftue, wenni es paar überchume. Ich han leider kei Föteli mit minere Kamera mache loh. Hoffe, ihr chönd no chli geduldig sii :P

Grüässli zrugg

##Zivil am 10 Juni 2010 -- Trauung am 10 Juli 2010##

• Zitieren

So liäbi Brüütlis
Ich habe noch ein paar Fotos bekommen und präsentier sie euch noch





##Zivil am 10 Juni 2010 -- Trauung am 10 Juli 2010##

• Zitieren

nicht registriert

mir gefällt deine super hochsteckfrisur. sieht mega aus!

• Zitieren