Anmelden Anmelden[ x ]          
| Passwort vergessen?
Registrieren  |  Suche Anmelden
Forum    ›   Anlässe    ›   Honeymoon    ›   Australie
Australie
 1 2
pluto2008  am 21.11.2008

Australie

Hoi zäme

Han welle frage ob öppe vo eu Flitterwoche in Australie verbringed? Falls ja, was för en Route mached ihr?

Esch söscht scho öppe emou gsi ond was chönnt ihr ois empfehle? Mer wörded gärn för 2 Mönet goh!

Grüessli



Liara

nicht registriert

am 27.01.2009

Re: Australie

Hallo Pluto

Yeah, mir gönd au für 2 - 3 Mönet uf Australie! Wän gönd ihr?
Mir hüratet am 8.8.2009 und mached d Hochzietsreis im Februar 2010.

Flüge düemer uf Cairns und als Rucksacktouris reisemer vom Norde in Oste bis Sydney.
Vo Sydney flügemer uf Perth und denn reisemer bis Darwin. Vo Darwin flügemer den hei.

Strecki Cairns - Sydney: Unbedingt go Tauche am Barriere-Riff, Surfers Paradise au nid verpasse!!!!
Strecki Perth - Darwin: In Perth Bar Brass Monkey bsueche!!! Pinnacles sind no witzig, aber
schlussentlich glich nur Stei ;)... Kalbarri isch super schön, Monkey Mia mit Delfin schwümme,
Coral Bay und Exmouth hät Stränd wie uf de Maledive!!!!

Also wie du lisisch kenn ich West Australie scho, drum chani dir det meh verzelle. Über de Oste weiss ich nid viel, drum gömer au namal... ;-)

Froi mi sooo sehr. Schrieb mir unbedingt was ihr vor händ. Nimt mich Wunder

cheers Liara



calla  am 01.02.2009

Re: Australie

hallo mitenand

cool, mer gönd au uf australie id flittis. mer werdet miteme mietauto ein monet unterwägs si.
da mer erscht im juni 2010 hüratet simmer leider erscht im oktober 2010 in australie.

min schatz hät mal es halbs jahr dänne gschaffed aber das isch au scho 6 jahr sither... mer freued eus riesig!!

greez calla



muraki

nicht registriert

am 18.03.2009

Re: Australie

Hallo wir gehen auch nach Australien. 2 Monate unsere Route mit dem Auto von Sydney bis Cairns. Diverse stops an all den wunderbaren orten. Flug nach Darwin, dort gehts in ein Naturschutzbiet zum Ayersrock und von Alice Springs mit dem Ghan (Zug) nach Adelaide und dann der Great Ocean Road entlang bis nach Melbourne... Ich war schon mal in Australien und ich kanns wirklich nur empfehlen. Der Osten ist etwas grüner aber auch der Westen (Perth) ist nicht schlecht. Ach am 9. Januar 2010 fliegen wir ab.. wir freuen uns.



pluto2008  am 18.03.2009

Re: Australie

Hallo Liara

War jetzt länger nicht mehr im Forum...wir heiraten auch am 8.8! Fliegen ende Oktober für 2.5 Monate nach Australien und Neuseeland und freuen uns riesig!

Gruss Anna



fraztaz  am 19.03.2009

Re: Australie

hallo zämä

mir sii o vor 2 jahr z'australiä xi. cha leider nid verzeuä, das es eus gfauä hät, aber jedem das seinä gäu.

lueged uf jedäfau unbedingt, wenn ihr diä strecki brisbane - sidney - melbourne - adelaide mached --> i därä reihäfolg u nid umgekehrt. mir hei da vom reisebüro ganz ä schlechti beratig ka. s'isch drum aues uf di ander siitä umä gschilderet u d'infos chömid erscht, wenn me scho vorbii isch.

i mues sägä mir hei o höllä pech ka mit em wetter (september - dezember). isch nid viu xi mit warm u sunnä. bi üs häts im november gschneit u mir hei üs müessä winterjackänä go suechä/chaufä. isch nid so eifach im summer z'australiä

i wünschä natürli gliich aunä superschöni flitterwuchä/-mönät!

Am 05.09.09 isch es sowiet!



Liara

nicht registriert

am 09.04.2009

Re: Australie

Hallo Pluto

Kei Problem, bin au nur immer wieder sporadisch im Forum. Lustig das mir sogar am gliche Tag hüratet. =)

Frage an dich... wie mached ihr das nach em Hochziet? Gönd ihr grad nacher zuesätzlich no id Ferie oder gönder grad wieder go schaffe? Mir händ ebe zerst dänkt, dass mir nachem Hochziet grad wieder go schaffe gönd, aber irgend wie findemer das jetzt doch chlie schad. Isch halt au chlie en finanzielle Punkt, da mir ja 2-3 Mönet uf Australie wänd, hämer zerst nid au no dä Summer id Ferie welle. Jetzt aber nach richlichem überlege, händ mir doch no Ferie bueched. Mir flüged grad am Suntig Abig 9.8. für 9 Täg id Maledive. :)

Mir wänd eifach nid im Nachhinein bereue, dass mir nachem Hochziet nid irgend wo no chlie euses Hochziet usklinge lah und gnosse händ. Isch zwar chlie übertriebe und au chlie tür, aber jetzt machemer halt grad nachem Hochziet Flitterwuche und im Früehlig 2010 den 2-3 Mönet Hochzietsreis... ;-) Janu, schliesslich hüratet mär ja hoffentlich nur ei mal im Läbe... smile

Liebe Gruess
Liara


Mir hüratet am 7.8.09 Zivil und am 8.8.09 Kirchlich



pluto2008  am 22.04.2009

Re: Australie

Hoi Liara

Ech han jetzt müsse schmunzle als ech din Itrag glese han.

Mer händ ois das au überleit gha was mer wänd mache, mer chönnt denn au ned vell Ferie neh nochher, nor e paar Täg well mer im November-mitti Januar uf Australie gönd. Ech han denn no Verwandti us em Usland da ond finds au ned grad so nett, wenni am Sonntig am morge mech abmelde. Mer werded sehr wohrschienli am Mäntig frühe is Tessin goh för 3 Täg oder goh wellnessse.

Mer send daför jetzt grad vo de ferie cho! Send för 2 Woche in Thailand gsi ond ech ben jetzt weder voll entspannt zrugg cho;-)

Was händ ihr scho alles vorbereitet?

Grüessli pluto2008



Liara

nicht registriert

am 24.04.2009

Re: Australie

Hello Pluto

Also mir händ bereits organisiert:
Brautkleid mit allem Zubehör
Standesamt
Kirche und Pfarer
Kutsche mit Blumenschmuck
Raum für Apéro
Catering für Apéro
Steelband für Apéro
Restaurant für Fest
Einmann Unterhaltung für Fest im Restaurant
Hotelzimmer für Brautpaar
Photograf
3 Kleider für Brautjungfern
Einladungen versendet
Flitterwochen ;-)
Coiffeur und Kosmetiktermin

Noch erledigen müssen wir:
Trauringe
Blumenschmuck (Kirche und Restaurant)
Brautstrauss
Bräutigam einkleiden
Ehevorbereitung auf Gemeinde
Tischkärtchen (machen wir selber)
Deko für Raum Apéro

hmmm... das wärs glaub ich...

Und ihr? Händer alles scho fix fertig parat?

Gruess Liara

Mir hüratet am 7.8.09 Zivil und am 8.8.09 Kirchlich =) jupiii



ellybis  am 07.05.2009

Re: Australie

Hallo zäme

Mir hürootet am 11.7.09 ond hend denn bis ond mitem Mittwoch nochem Hochziit frei. Zerscht hemmer gmeint, dass mer irgendwo ane gönd, hend etz aber beschlosse, dass mer wärdet dehei bliibe, zom üse grossi Tag ond die viele Iidröck z'verarbeite, allefalls wärdemer ab & zue es Uusflügli mache. Aafangs Auguscht flüügemer denn 3 Woche of d'Azore (inkl. Abschtächer nach Lissabon ond Porto).

Üsi grossi Hochziitsreis werd üs denn ab Ändi Januar 2010 vier Mönet of die ander Siite vode Wält füehre:

Mer flüüget zerscht nach Hongkong, machet dött en Stopover, nocher gömer via Sydney of Hobart, reiset ca. 2 - 3 Woche mitem Camper dör Tasmanie, denn gohts zrogg of Sydney ond vo dötte döruuf bis mindeschtens of Cairns. Vo dötte flüügemer via Sydney oder Brisbane noch Auckland, Stopover in Auckland ond denn zwo Woche Entschpannig pur of de Cook Insle. Ab dört gömmer denn wieder zrogg noch Auschtralie, nämlich noch Perth. Vo Perth us fahremer mitem 4x4-Camper bis nach Darwin. Tja, ond nocher heissts denn langsam aber sicher wieder Abschied näh vom schöne, unbeschwärte Reiseläbe. Mer chömet via Stopover in Singapore irgendwenn Ändi Mai zrogg id Schwiiz.

Das ganze Hin- ond Härflüüge zwöschet Auschtralie - Tasmanie - Auschtralie - Neuseeland - Cook Insle - Neuseeland - Auschtralie tönt zimlech chaotisch, ond i bi zerscht ächt verschrocke, aber mer hend ebe bereits während üsere 1. Downunder-Reis im 07 en Abschtächer of d'Cook Insle gmacht, ond das isch ächt paradiesisch gsi. Drom nämemer die viele Flüg etz halt in Chauf.

Findi kuul, dass ehr alli au of Auschtralie gönd, teilwiis simmer jo sogar gliichziitig dötte
Bis dörthii wünschi eu allne ganz viel Vergnüege bide Hochziits- ond Reisevorbereitige, ond natürlech en Huufe vo, Vofreud prägti Momänt!

Alles Gueti,
Ellybis



Wir haben am 17. Oktober 2008 auf dem Zivilstandsamt JA gesagt und freuen uns nun riesig auf unsere kirchliche Hochzeit am 11. Juli 2009!



 1 2

ÜBER UNS

HOCHZEIT.ch ist ein unabhängiges Portal und beliebter Treffpunkt für Brautpaare und Dienstleister aus der Hochzeitsbranche.