Am Samstig han ich min Polterabig gha.
S` Einzige wo ich gwüsst han, ich muess am halbi 4i uf dä Bus und ich muess mich warm alege.
Bin ja wiedermal froh gsi, dass dä Wetterbricht nöd immer stimmt. Statt starkem Rege händ mir Sunneschii gha.
Eigentlich bin ich dänn gar nöd so nervös gsi. Ich han mir eifach im Vorfeld immer mal wieder Gedanke gmacht, wie sich die Gruppe wohl zämäfindet, da ich 2 verschiedeni Fründechreise han wo sich nöd guet kenned. Zudem ischs hald au speziell gsi, will ich kei Alkohol dörf trinke und ich suscht eigetnlich immer gern mal eis nimme…. Neugier isch gross gsi!

Im Bus händ mich dänn 3 Fründinne empfange. Sofort han ich es T-Shirt mit dä Ufschrift: Die Braut die sich traut müesse alege. Es hät no ganz fiisi (unvorteilhafti) Fotene vo mir druf gha. Hine druf isch gstande: ODER??? Und 2 Fotene vom GG. Zudem händs mir ä riise Elefantemütze ufgsetzt und los isch gange. (bin mir nur biz blöd vorcho….. )

Im Zug uf Züri händs dänn dä Wy uspackt und für mich en Liter Früchtetee. Han ja im erste Moment no dänk sie seged ja so lieb und händ a alles denkt… im 2. Moment wo ich mis Trinkgfäss gseh han, han ich dä Gedanke grad wieder verworfe. Han dä ganz Abig müesse usere Urinfläsche (NEU!!!!) trinke! Für mich als Pflegfachfrau scho chli traumatisierend

In Züri hämer eus i 2 Gruppe ufteilt (je 7) und händ en FOXTRAIL gmacht. Mini TZ hät das super organisiert. Gruppe händ sich nämlich müesse mische und so händ sich all inere chlinere Gruppe chöne besser kennelerne. Hät super funktioniert und mir händ sooooo glached!

Gässä hämer i dä Commihalle und nacher han ich mini Ufgabe übercho…

I dä Mausefalle han ich dänn die müesse umsetze…. Isch no speziell das alles nüchtern z`mache. Ich glaub wenn ich atrunke gsi wär, het ich das sauglatt gfunde. Nüchtern isch es scho au luschtig gsi, aber ich bin froh gsi wo ich alles erledigt gha han.
Sind dänn no bis am 2 gmüetlich i dä Lounge ghöcklet und händ plauderet und gfiired!

Ich han dä Abig mit mine Mädels in volle Züge gnosse und ich finde mini TZ hät es total passends Programm zämägstellt.

Ich als Schwangeri han mich dänn am 2 verabschiedet, die andere sind dänn no wiiter zoge und händs no mächtig krache lah! (uf die Fotene bin ich ja mal gspanne)

Ja, jetzt han ich poltered und bin parat für dä Schritt i d'Ehe

• Zitieren

layonie, das tönt jo sehr luschtig. Das het dini TZ würklich toll gmacht.

***verliebt 10.12.2005 - verlobt 09.07.2011 - heiraten 17./18.08.2012***

• Zitieren

nicht registriert

mmhhhh Früchtetee us dr Urinfläsche, ka mir au nüd bessers vorstelle...
Super Idee vo dinere TZ und ich verstand dich, dass me im nüchterne Zuestand so Spieli eher peinlich findet wie lustig. Aber du hesch dich jo tapfer gschlage..
Toll, dass du als Schwangeri so lang mitgmacht hesch und dass dini Kolleginne (trotz verschiedenem Kollegekreis) elei witter zoge sind!
Freu dich jetzt uf die nägste 2 tolle Däg!

Lg, dia

....unser Traumtag war am 21.5.2011...

• Zitieren