Jö Lula danke vilmol mega lieb . S Wätter gseht bis jetzt immer no guet us für am Samstig wörd mi meegaaa freue wenns so wörd bliebe .

• Zitieren

Guete Morge Zäme

Eigentli hani welle hüt mi Bricht schriebe no vor eusne Flitterwoche aber irgendwie beni eifach grad nonig so fähig das alles in Wort z fasse wo mir erläbt händ. Es esch soooooo e wunder wunderschöne und emotionale Tag gsi, mir fehle im Momänt eifach immer no d Wort .

S het alles super klappt, s Wätter esch traumhaft schön gsi und s Festässe i de Seerose esch def. es Highlight gsi, wow also die händs ächt mega druf gha ! S esch so härzig gsi, mir händ jo fast alli im Hotel übernachtet und am nächste Tag hämmer es paar vo de Servicelüüt vom Obe wieder gseh, denn händ eus 2 vo dene unabhängig vo enand gseit sie sige nonie a sonere schöne Hochzyyt debii gsi sie hege total gärn für eus gschafft am Obe es hegi sie richtig gfreut debii z sii, jöööö soooo es schöns Komplimänt das het eus mega grüehrt .

Ich schriebe de ganzi Bricht gärn nach eusne Flittis, morn gohts los und hüt esch jetzt packe und vorbereite agseit. Euse Fotograf esch de Hammer, er het eus vorab scho paar Fötelis gschickt, esch grad am Sunntig as bearbeite gange. Also wer möcht, ich schick gärn paar per PN .

• Zitieren

nicht registriert

Eve das tönt ja würklich troumhaft! Das chumi säubr grad wieder itz tröimä vo üsärä eigätä Hochzyt... äs isch eifach dr Hammer we aus klappät und d Stimmig guät isch mäs so richtig cha gniässä.

Z Komplimät vom Bediänigspersonau isch natürläch nid z überträffä!

Fötäli würdi natürlich o gärn spiänzlä...

• Zitieren

So Ladies, jetzt beni au ändlich parat zum mi Bricht schriebe (hoffi zumindest) .

Mi Maa und ich händ d Nacht vor em Hochzyystag getrennt verbrocht. Er het scho im Hotel Seerose übernachtet zum det denn am nächste Tag au eusi Gäst z empfange und ich ha bi mine Eltere gschlofe . Am Friitig hämmer beidi frei gno und so ganz gmüetlich die ganze Dekosache chöne ilade wo mi Maa denn am Obe mitgno het. Am Nomittag bi ich mit mine Schwöstere denn nochli go wellnesse zum chli entspanne und denn simmer zu mine Eltere gfahre und händ det feini Mami-Pizza gässe, mhhhh das esch doch eifach s Beste .

Am nächste Tag eschs denn rächt früeh losgange. Am halbi 8ti esch mi Stylist zu mine Eltere heicho und het det mich und mini Schwöstere und mis Mami parat gmacht. S Make-Up esch suupeerr worde das het er ächt extrem im Griff gha. Wo's denn ad Frisur gange esch eschs mir e Momänt nüm so guet gange. Ich ha s Gfühl gha ich ha eifach nur es verdammts Gheu ufem Chopf und ha mi überhaupt ned wohlt gfühlt, ich ha nur die ganz Zyyt dänkt hei nei ich getrau mi so ned id Chile inelaufe wo mi alli Lüüt denn aluege ich finds eifach nur schrecklich . Ha denn gseit ich fühli mi ned eso wohl eso (er het mir d Hoor hinde ganz komisch so halb offe gloh, da ich aber ganz fiini Hoor ha hets usgseh wie es verzützlets Huehn!), ha denn gseit er söll mir d Hoor bitte ganz ufestecke. Ha denn no paar Hoorchlämmeri unterschlage und wo er wäg gsi esch mit mine Schwöstere no s einte oder andere sälber inedo bis ich mi denn mit minere Frisur ha chöne einigermasse afründe. Ich sägs euch, im erste Momänt hätti eifach nur chöne loshüle woni mi im Spiegel gseh ha, und zwar ned vor Rüehrig oder Glück! Aber ebe, dank de Rettigsspängeli und dass er mir denn alles no ganz ufegsteckt het eschs denn gange. Und irgendwenn hani dänkt, ach sch.... drauf, ich ha es super hammer Make-Up und i de Chile und zum Fötele hani eh no de Schleier drüber do gseht me eh ned viel vo mine Hoor *g*. Weni jetzt d Föteli so aluege vo de fertige Frisur muesi säge s esch denn eigentli ächt ok gsi, eifach de erst "Entwurf" het me gar ned chöne bruche *g*.

Guet nachdem d Frisurekrise einigermasse überstande gsi esch hani versuecht nochli öpis z ässe, mis Mami het extra Brötli und so für eus vorbereitet gha, aber ich ha fast nüt abebecho bi sooooo ufgregt gsi. Mini best Fründin esch denn no schnäll cho, sie het für eus d Blueme zum d Chile dekoriere gholt gha und mi Brutstruss etc. und het mir de no schnäll brocht. Wow mi Struss het mir meegaaa gfalle, esch zwar ganz andersch usecho als ich dänkt gha ha aber sie händs ächt super schön gmacht, bi happy gsi .

Öpe am halbi 1 hämmer denn mol mis Chleid gholt und mini Schwöstere händ mir ghulfe alegge und mi igschnüert. Jöö s esch so härzig gsi, s sind alli ganz grüehrt gsi woni denn so in Vollmontur det gstande bi . Mir händ denn dusse no paar Föteli gmacht und denn esch scho gli mol euse Chauffeur cho zum mi abhole. Mi Papi esch mit mir im Auto mitgfahre und mini Schwöstere sind mit mim Mami zäme i eim Auto id Chile. A de Chrüzig wo mir denn hätte müesse drüberfahre bi de Hauptstross vom Dorf hämmer grad no de Car gseh wo alli eusi Hochzyytsgäst und mi Maa id Chile brocht het, haahaaaaaaaaaaaa soo lustig gsi alli Gäst sind ade Schiebe kläbt und händ gwunke und Freud gha und mim Maa sind grad d Auge zueghebt worde vo eusem Tätschmeister damit er mi au jo ned cha gseh .

Bi de Chile hämmer denn gwartet bis alli Lüüt dinne gsi sind und denn beni mit mim Papi und mine beide Schwöstere zu de Chile gloffe (sie sind ebe quasi mini Vorbrüt gsi oder wie me dem seit). Vor de Chile het denn mini Schwögerin gwartet mit mim Maa sim Göttimeitli, sie esch euses Ringmeitli gsi . Mir händ eus denn alli positioniert und denn eschs scho losgange. Vorus mini Schwögerin mit Göttimeitli vom GG und Ringchüssi, nachhär mini beide Schwöstere und denn ich mit mim Papi. Vor de Chile usse händ mi Papi und ich no fast Witz gmacht so nachem Motto jo müemer luege dass mir denn ned stolpere und so, also ich bi eigentli rächt entspannt inegloffe am Afang. Denn hani zu mim Papi überegluegt und gseh dass er ganz roti Auge het und paar Tränli usechöme und denn hets mi au grad gno. Ich ha eigentli alli Lüüt welle aluege woni inegloffe bi aber irgendwie hani wie niemert wohr gno, ha nur mi GG gsuecht vorne und ha alles andere irgendwie total usbländet. Hihi zerst hani ne ned gseh will er chli siitlich gstande esch und ich ha e Momänt gar ned gwüsst wo ich ehn jetzt finde, s esch soooo schön gsi woni ne denn ändlich gseh ha und de Usdruck i sim Gsicht wirdi glaub nie vergässe. Wow er het sooooooooooo schön usgseh und het mi agstrahlt und es het mi eifach alles umghaue ! Ich ha denn eifach nur no zu ehm welle und bi mim Papi glaub fast devogsprunge , mir händ eus küsst und er het mir gseit ich hegi es hammer Chleid und ich gsächi so schön us.

• Zitieren