soooo, mini liebä! I bi offiziell verhüratet... Es isch dr Hammer! so isch üsä Tag gsi:

Am Fritig Abe hani no mau ä Nervositätsafau gha und spontan no so Faltblättli für üsi Gest gstaltet mitem Ablouf, Infos zur Trouig, zum Apéro und zum Ässe sowie Dank dass sie drbi si. Erstuunlecherwiis hani rächt guet gschlafe u ou woni am morge am 7ni bi ufgstange, bini nid würklech nervös gsi. Ha düschelet und mi zwäg gmacht, d Frisur het gad bim erschtä Mal klappet und bim schminke hani ou no rächt ä ruhigi Hand gha.

Am 9i si mir när mit üsem Mini losgfahre zu GG's Schwo fürs Shooting. Es het mega Spass gmacht u d Föteli si cool worde. Mir si so zumnä Feldwäg ir nächi vo det wo sie wohnt und dr Hintergrund het würklech guet passt für das, was mir üs vorgstellt hei. Da mir sie ja guet kennä, isch ou d Stimmig vo Afang ah locker gsi. I ha süsch mängisch immer chli Hemmige weni fotografiert wirdä...

Am Mittag si mir wieder dehei gsi, hei üs fürs Ässe no mal angers agleit u während GG dr vorbereitet Gratin het i Ofä gschobä, bini no schnäll zur Gärtnerei ga d Strüssli für mi u üsi Ladies im OK abhole. Sie si mega schön wordä, aber leider hets irgend es Problem gäh bi dr Lieferig und d Ranunkle si nid acho. Aber i ha ja zersch gar nid unbedingt eis wöuä und's när mega spontan no bstellt, drum bini nid wahnsinnig enttüscht gsi. V.a. wöu sie trotz auem mega schön hei usgseh.

Nachem Ässe hei mir kei Ahnig gha was mache, drum si mir no mal chli ga liegä. I ha wägä dr Frisur nur ufem Buuch chönnä liegä, aber het glich grad guet tah, no mal chli abefahre... Aschliessend hei mir üs wieder i Schale gworfe und si mitem Bus id Stadt zum Träffpunkt gfahre. Es isch scho no luschtig gsi, wie d Lüt reagiert hei - vo blöd astarre bis gratulierä hei mir alles erläbt.

Bim Träffpunkt dr erscht Schock: Mis Mami het mir es Strüssli lah mache!!! es het mir so Leid tah... Witzig isch gsi, dass es vo de Farbe genau glich isch gsi, wie die wo ig bstellt ha. Wöui d Froue ha drmit wöue überrasche, hani gar niemerem drvo verzellt gha. Isch natürlech blöd gsi im Nachhinein. Aber mis Mami hets überhoupt nid schlimm gfungä u när hei mir halt no es Extra-Strüssli gha wo sich d Fründinne vo de TZ chli hei chönnä teilä...

Wo alli si da gsi, hei mir üs ufe Wäg gmacht zum Standesamt. Also, das Zeremonielokal übertrifft ds Gebäude vo usse i sire Hässlechkeit bi witem!!! Ganz schrecklech... mir si üs vorcho wie bi Scientology oder so. Mega futuristisch igrichtet, mit komischer belüchtig und so glitzersteindli ar Wand! (klar, isch gschmacksach... aber zu üs het das jetz würklech überhoupt nid passt ). Aber i has nid so schlimm gfundä, wenn üs das wichtig wär gsi, wäre mir uf Bümpliz gange.

Mir si när so ine Wartsaal gfüehrt worde wo üs d Standesbeamtin de isch cho abhole. Immerhin isch die super sympathisch gsi und sie hets würklech guet gmacht. Sie het ds ganze so chli locker und witzig gstaltet, genau wie mirs üs gwünscht hei. Vorem Ja-Wort bini scho gad mega nervös gsi, GG het gseit i heig ihm fasch d Hand verdrückt. Aber i ha es klars und dütlechs JA usebracht. (GG's Schwo het üs drum am Morge no vomnä Kolleg verzellt, wo us spass het gseit, er sig nid sicher... U die hei när hei müessä und ä nöiä Termin abmache... )
När hei mir no müessä unterschribä und de isch das ganze scho erledigt gsi.

Wo mir usem Ruum si use cho, het die erschti Überraschig uf üs gwartet: GG's Schwo het mit ihrnä zwöi Buebä (dr eint isch GG's Göttibueb) dert mitemnä Apéro uf üs gwartet. Sooo härzig... Mir hei lang überleit ob mir sie nid doch wei Ilade, aber da mir d Trouig würklech im chline Rahme hei wöuä halte, hei mir üs de schweren Herzens drgägä entschiedä. Drum hei mir üs mega gfröit, sie ds gseh...

Nach däm mir agstosse hei gha, si mir zum Apéro uf die chlini Schanze. Das isch ou super gsi, v.a. wöu per Zuefall gad ds Zytfahre vor Mountainbike-EM det düregfüehrt worde isch und mini Besti und ig ja agfrässeni Bikerinne si. Ds Apéro isch ou super gsi, es hei sich alli wohl gfüehlt und es isch guet acho... Die 2 Stund si wie im Flug verbi, i bi würklech froh, dass mir so viel Zyt iplant hei. Zersch hei mir dänkt gha, 1 Stund würdi ou länge... Ou im Hinblick uf üsi chirchlechi Trouig wo mir 4h iplant hei, bini jetz würklech sicher, dass mir so lang bruchä.

Nachem Apéro si mir is Frohsinn ga Ässe, das isch sit längerem üses Lieblingsresti und es isch die besti Wahl gsi, wo mir hei chönnä träffe. D Bedienig und ds Ässe isch eifach super gsi, sie hei sich mega Müeh gäh. Mir hei im Houptgang Rind gha und es isch perfekt brate gsi und ou im Nachservice super. Ds Dessert isch ou dr Wahnsinn gsi... I bi würklech meh als Zfriedä gsi. Es hei ou alli Gäst mega gschwärmt, i dänkä das Resti het grad paar neui Gäst gwunnä...

• Zitieren

Nachem Dessert het üs üses OK ä Umschlag überreicht mitemnä Uftrag drinne: Mir müessä im nächschtä Jahr bis zum Hochzyt jedi Wuche es Föteli inä Dropbox-Ordner ufelade mitemnä ussagekräftige Titel. Bi ja gspannt was sie de am chirchlechä HZ mit denä Föteli mache. Aber i finde d Idee super... I loufe eh immer mit dr Kamera ume, vo däm här sötts nid so schwierig wärdä. Eher alli Wuche es speziells Föteli z mache wird ä Herusforderig.

Denn isch d Überraschig vo GG's Elterä dra cho - wo als erschti Überraschig ou mini Elterä dranne beteiligt si gsi. Mir hei nachenand drü Postcharte übercho, wo Hiiwiesä druffe gsi si, wo dass mir d Nacht wärde verbringä. Mir heis mega lang nid usegfunde... Aber irgendwenn het's klick gmacht: Ds Parkhotel Gunte! Und denn d Frag: wie chömä mir vo Bern det härä? de hei üsi Elterä gfunde, da sie üs jetz de nümme so eng werdä begleitä wie bis anhin (mir isch grad es luts "Neeei?!" usegrütscht), heigä sie sich zur Feier des Tages ou es Zimmer reserviert... I ha mi mega gfröit drüber, wöu i ha mit mine und ou mit GG's Elterä es mega guets Verhältnis. GG genau so... Mir hei üs de ca. am 11i am Abe ufä Wäg gmacht uf Gunte, ig bi mine Elterä im Outo, GG bi sine. Wo mir det si acho, hei mir als erschts gad d Zimmer bezogä. GG und ig hei d Junior Suite gha, dr HAMMER!!! Mini Schwimu het für üs es Köfferli packt gha mit allem wases brucht, sie het sogar a Linsemittel und -Schäli für mi dänkt! Eifach super... Denn si mir no bis am 2 unde ir Lounge ghöcklet und hei es Schlummertrünkli zämä gnoh bevor mir de si ga schlafe. Ig hät gärn no die geili (sorry!) Badwanne i üsem Zimmer usprobiert, aber GG isch kaputt gsi. Drum hei mir am Samstig am 7ni dr Wecker gstellt und vorem Zmorgä bädelet.

Bim Zmorge hei mir üsi Elterä troffe und si aschliessend no bis am Mittag ir Sunne im Park ghöcklet, hei chli Schampus gschlürft und dr Fritig lah Revue passierä. Es isch super gsi, i has mega gmüetlech gfunde, dr Morge mit ihne z verbringä... Am 1 si de GG und ig mitem Schiff uf Thun gfahre und de mitem Zug hei - totmüed und überglücklech ids Bett gheit und chli nachegschlafe. I bi soooo froh gsi, dass mir nid gad am Tag druf die chirchlechi Trouig hei gha. I gloub das hätti nid überläbt... all die vielä Idrück und Emotionä hei mi würklech fertig gmacht.

Jetz geits morn ab nach Kopenhagen id mini-moons. I fröiä mi mega druf... Die erschti Reis mit mim Ma!

I ha leider no nid so viel Föteli... Nur die vo GG's Schwo (die het si scho nach dr Trouig fertig bearbeitet mitbracht ) vom Shooting am morge.

• Zitieren

hey malinchen

ich mach amis en print scren (screenshot) vo de bilder... aber mer gshets guet!

• Zitieren

morge malinchen! i due si Emmer komprimiere.. d Qualität esch au ned super aber es langet! ;)

dane för din usfüehrliche bricht! so toll was sech euchi lüt alles för euches zivile hend lo ifalle! :D
gratuliere der ond dim maa ganz herzlich ond wönsche euch alles gueti!

• Zitieren

Och so schön! Tönt nach am ne genial schöne Tag!!

Danke viu mau fürs Teile vom Bricht u dFotis! zRot isch ja genial dür aus dürezoge!

I wünsche euch wunderschöni Mini-Moons u e perfekte Start i öiches Eheläbe!


Wäg de Fotis, i tue se immer am PC mit am Windows Programm verklinere

• Zitieren

Nach üsem Zivile hei mir üs chli ä Pouse gönnt mit Vorbereite. Jetz si mir aber wieder ziemli dranne. Ide letschtä Täg hani a üsne Gastgschänkli gwärklet u 7kg Meertrübeli mit 5kg Nektarine zu Konfi verarbeitet. Geschter Abe hani de no d Etikettä ufd Gläsli kläbt, Tüechli für überd Dechle zuegschnitte und no bi jedem es Bastbändeli drum bunde.



Usserdäm hei mir (dank dr Taeboyana ) üsi Fotografin gfunde und gester gad Zuesag gschickt. Ei Punkt meh wo mir chöi abhägle.

Aus nächschts steit uf dr To-Do-Liste:
- Band für bim Apéro
- Caterer für's Apéro
- DJ für am Abä
- und i eim Monet scho: Chleid-Shopping...

• Zitieren