Ich bin meischdens nume e stilli Mitleserin gsii und das Forum het miir für miini Hochziit vill Hilf bote, darum möchte ich oi natürlich au vo oisem schönschde Tag verzelle…

Am 13. Juli 2013 isches endlich so wiit gsii, nach zwei Jahr verlobt sii hend miirs chum meh chöne erwarte… Zwei Jahr lang vorbereitige, mer stellt sich de Tag immer vor und denn ischer endlich da…
Da ich normalerwiis e sehr nervösi Person bin und s miir schnell vor Nervosität schlecht wird, han ich welle d Trauuig möglichschd spat am Tag mache aber gliich no gnueg früeh damit de wiiteri Tagesablauf au no langed.. Uf jede Fall han ich und miin Maa a dem Samschdig chöne bis am 8i schlafe und denn gmüetlich uufstah. Ich han i de Nacht überraschend guet gschlafe, bin au nie uufgwachd oder so (guet bin am Abig vorher au gnueg Müed gsii)… Miir hend ois denn parat gmacht, ich han mir fengs s Make-up (also eifach d Grundierig) druff tah und es halbs Naturjoghurt gesse, für meh hets leider au nüme glanged und bin denn abgfahre zu miinere Coiffeuse… Am halbi 10 bini dete gsii und miini Schwöschter (Trauzüügin) isch au grad det acho… Im Coiffeursalon hends ois und miinere beschde Kollegin d Frisure gmacht und mir hends u luschtig gha. Ich bin denn so ca. halbi 11 wiitergange, während mini schwö und kollegin no gschminkt worde sind. Ich bin denn zu de Schwöschter vo miim Maa heigange zum miich goge parat mache. Miis Mami isch denn mit em Bruutstruus verbiicho und de Fotograf isch au no cho zum es paar Föteli schomal mache… Ich han mich denn det selber gschminkt (bin ebä uusbildeti Visagistin und hans darum natürli nöd öpper anderem welle überlah). Plätzlich ischmer während em parat mache d Chlammere vo miinere Frisur us em Haar use gheit, uii han ich panik übercho, han miir scho überleite ob ich namal zu miinere Coiffeus söll fahre aber das hetti denn en riisige stress geh. De Fotograf hät mi versuechd z beruige und miis Mami hät mer die Frisur wider zemegflickt es hät denn also au de ganzi Tag ohni Problem ghebed und mer hets au nöd gseh...
Denn hani nur no uf miin Papi müesse warte bis er mich chund go hole und mit em Maserati zu de Trauuig fahrd… Er isch denn ziemlich knapp cho (han denn no en stängel gesse damit i öppis im Mage han) und miir sind zum Rosenmattpark in Wädenswil gfahre, wo miir im wunderschöne alte CHilegmeindshuus e Zeremonie gha hend. Wo ich det acho bin, hets es paar Lüüt dusse gha wo gfötelet hend und gfilmed, miini schwöschter het det gwarte und alli Auge sind uf miich grichtet gsi es isch es überwältigends Gfühl, vo Nervosität, isch zu miinere grosse überraschig, praktisch nüt z gspüre gsiii… Miin Vater und ich hend gwartet vor em Ruum bis de Pianist mit em Hochziitswalzer aagfange het. Wo miir inegloffe sind und ali Auge uf miich grichtet gsi sind, han ich eigentlich nöd mal so mitübercho, ich han nuur miin Maa aglueged und miir sind grad d Träne cho, das isch eifach en überwältigende Moment. Vili seged dasmer d Trauuig gar nöd so mitüberchunnd aber das isch bi miir absolut nöd de Fall gsii. Ich han jede Biitrag richtig i mich uufgsoge und es hend so vill vo Familie und Fründe öppis vortreit was für ois eifach wunderschön gsi isch (Oisi Zeremonieleiterin het alles guet organisiert gha). Miini schwöschter het während de ganze Trauuig drü Lieder (Hemmigslos Liebä, From this moment on und Raise me up) gsunge, in begleitig vomene Pianist und es hend villi im Ruum mit de Träne kämpft Miin Maa und ich hend ois denn no es Trauverspreche vorgseit und siini Cousine (5Jahr alt) het ois d Ring füre bracht… Es sind au Verwandti vo Italie und vo Portugal det gsi was ois extrem vill bedütet het und au die sind mitiibezoge worde… Nach em uselaufe isch als erschds miin Vater, miim Maa goge gratuliere und miin Maa het Träne i de Auge gha (was ich i dene ganze 8 Jahr wo miir zeme sind no nie gseh han). Das isch für miich au en sehr bewegende moment gsi. Denn hend miir s AperoBuffet eröffned und sind verusse (isch ja Hammer Wetter gsi) alli gratulatione go entgege neh. Miir hend d Trauuig ebä nume mit de gladene Gäscht gmacht und d Apero gäscht hend denn scho dusse gwartet. Es hend ois eine nachem andere gratulierd und miin götti het no es spiili vorbereitet gha. Ich han müesse Teller ime becki abwäsche und no nass über es tuech werfe... dehinder isch miin Maa gstande und het die Teller müesse uuffange ohni daser miich gseh het, also es sind eifach plötzlich teller z flüüge cho Nach zwei Stund (isch wie im Flug vergange), villne Föteli und wenig esse sind miin Maa und iich im Maserati denn wiitergfahre zum Schloss Au namal es paar Föteli goge mache. Da miir dete 20 Minute hend müesse warte bis d Barriere ufe gange isch, sind mir denn au zspat zum Apero im Park Hotel Weggis cho…

• Zitieren

Det hend mer am See namal es paar wenigi Föteli gmacht und no ganz churz de Apero mit feiner Bowle chöne gnüsse… Zerschd aber hend miir oises Zimmer (e wunderschöni Suite mit Whirlpool im Ruum) chöne bezieh und de Chef vom Hotel isch ois persönlich go begrüesse cho. Wo mer denn i d Aquarius Hall cho sind, wo s Esse stattfindet, hemmer e uu schöni Dekoration vorgfunde. Nach de erschde zwei Gäng hets denn es Spiili geh und dusse het mer chöne miteme Photobooth sich go vergnüege… Miir hend vo deTrauzüüüge denn no es Rezeptbuech überreichd übercho, wo jede Gascht ei Siite mit eme Rezept und Föteli gstaltet het, so Hammer gsi (ich choche ebä so gern und sammle regelrecht chochbüecher)… Churz vor em Turte aaschnide hend iich und miin Maa de Hochziitstanz gmacht. Es het aagfange mit eme langsame Walzer (Hijo de la luna) und denn plötzlich het d Musig underbruche und es isch vo Tanga, über de Entetanz oder Gangnamstyle ganz verschidnigi Lieder cho wo mer en Tanz iistudierd hend 7 Minute lang hemmer tanzed, wobii ich extrem uf miim chleid umegrutschd bin d Gäscht hend sooo froid gha. Alli hend am Schluss gseit das segi eis vo de Highlights vo oisem hochziit gsii, sie heged nie demit grechned. Denn hets no es riiisigs Dessert und Chääsbuffet geh, wo mer ois alli d Büüch vollgschlage hend. D Fotografe hend währenddesse e Fotishow vorbereitet wos zeiged hend, mit de beschde föteli vom ganze tag (natürlich au vom paratmache vo miir und miim maa). Isch no luschtig gsii und nachher het miin Papi e Videoshow zeiged, mit Film vo miim Maa und miir vo chlii bis hüt und es isch sehr bewegend au gsii, das z gseh! D Lüüt hend ois am Schluss soviel kompliment au gmacht für de ganzi Tag, miin Götti het sogar gseit es segi s beschde Hochziit gsi wo er je gange isch und das duet natürlich u guet dasmer gmerkt hend, das d Lüüt würklich uu froid gha hend und de Tag für alli nöd so schnell vergesse gaht… Ca. am 1i isch denn s ganze Feschd fertig gsii und miir sind zfride i oisi Suite gange und hend de Abig uusklinge lah
Am nechschde Tag hend mer no es vive la France Buffet im Park Hotel Weggis gnosse und ich ha am Tag vorher nöd chöne s ganze Dessertbuffet probiere aber bi dem Brunch hets au namal so e grosses Buffet gha und ha denn die Sache wo i vorher nöd ha chöne probiere, denn no gnosse De rescht vom Tag sind mer no mit em Maserati go umefahre und eifach nume in Erinnerige schwelge… Es isch eifach de schönschti Tag vo oisem Lebe gsii...

• Zitieren

Und no vom Abig:

• Zitieren

hallo nathi!

merci vell vell mol för de brecht und d bilder! du hesch traumhaft schön usgseh!!! s chleid, dini Frisur, de chi schleier vorem gsecht, dis strüssli... eifach alles gseht perfekt us!!!! wonderschön!!!!
ond natürli wönschi der ond din maa nachträglich alles liebi und gueti zor hochzit! und das er die zit as früsch verhüroteti chönet güsse und euch no lang a de tol tag chönet erennere!
merci vellmoll förs teile!!!

• Zitieren

Härzlechi Gratulation Nathi wunderschöne Bricht met wonderschöne Föteli!
Merci vöu mou förs teile met eus.

• Zitieren

Danke oi viiilmal für die liebe Glückwünsch und Reaktione das froit mich extrem...

• Zitieren